ಉದುರಿದ ಎಲೆಗಳು

ಮರದ ತೆಕ್ಕೆಯಿಂದ
ಕಳಚಿಕೊಂಡು ಬಿದ್ದ
ಹಣ್ಣೆಲೆಗೆ
ನದಿ ಪ್ರವಾಹದಲ್ಲಿ
ಸಿಲುಕಿಕೊಳ್ಳುವ ಆತುರ

********

ಅರ್ಧ ರಾತ್ರಿ ಮೊಂಬತ್ತಿಗಳು
ಉರಿಯುತ್ತಲೇ ಇವೆ
ಪಾಠ ಪ್ರವಚನ ಸರಿಯಾಗಿಯೇ ನಡೆಯುತ್ತವೆ
ಹೆಣ ಉರುಳೋದು ನಿಂತಿಲ್ಲ



********



ಹಗಲಲ್ಲಿ
ರಂಗು ಮಾರುವ
ಬಾಲೆಯ ಕೈತುಂಬಾ
ಬಣ್ಣಗಳ ಓಕುಳಿ
ರಾತ್ರಿ ಬರೀ
ಕಡುಕಪ್ಪು ಕನಸು



********


ಮಹಾನ್
ಪರ್ವತದ ತುದಿಯಿಂದ
ಉರುಳುರುಳಿ
ಪ್ರತ್ಯೇಕ ಅಸ್ತಿತ್ವ
ಸ್ಥಾಪಿಸಿದ
ಬಂಡೆಗಲ್ಲನ್ನು ಕೇಳುವವರೇ ಇಲ್ಲ!

ಮೇ ತಿಂಗಳ ಮೋಡಗಳು

ಬೇಸಗೆ ರಜೆಗೆ ಮಕ್ಕಳು ಸಾಲಾಗಿ
ಪ್ರವಾಸ ಹೊರಟಂತೆ
ಎತ್ತಲೋ ಹೊರಟಿವೆ
ಮೇ ತಿಂಗಳ ಮೋಡಗಳು

ಬತ್ತಿ ಒಡೆದ ಗದ್ದೆ ನೋಡುತ್ತ
ಕುಳಿತ ರೈತನ ಮುಂದೆ
ಅದೋ ಠೀವಿಯಿಂದ
ನಾಲ್ಕೇ ನಾಲ್ಕು ಹನಿ ಪನ್ನೀರು!

ಪೂರ್ತಿ ಮಳೆ ಸುರಿಸಲು ಈಗ
ಮೋಡಗಳಿಗಿಲ್ಲ ಸಮಯ
ಎತ್ತಲೋ ಪ್ರವಾಸ ಹೊರಟಿವೆ ನೋಡಿ

ಪಾತಾಳ ತಲಪಿರುವ
ಬಾವಿ ನೀರು ಪಾಚಿಗಟ್ಟಿದೆ
ಎಂದು ದೂರುವವರಿಗೆ,
ಪಟ್ಟಣದ ಪೈಪುಗಳಲ್ಲಿ ನೀರೇ
ಹರಿಯುತ್ತಿಲ್ಲ ಎಂಬ ನೀರೆಯರಿಗೆ
ಮೇಲಿಂದಲೇ ಅಣಕಿಸುತ್ತಾ
ಮೋಡ ಓಡೋಡಿ ಸಾಗಿದೆ

ನಗರದ ಗಗನಚುಂಬಿಗಳ
ಹಾದು
ವಲಸೆ ಹಕ್ಕಿಗಳ ರೆಕ್ಕೆ
ಚುಂಬಿಸುತ್ತಾ
ಬೆಳ್ಳಕ್ಕಿಗಳಂತೆ
ಹಾರಿವೆ ಮೇ ತಿಂಗಳ ಮೋಡಗಳು

ಇಂದು ರಾತ್ರಿ
ಅಥವಾ ನಾಳೆ ಘಟ್ಟ
ದಾಟಲಾರದೆ ಮಳೆ ಸುರಿಯಬಹುದು

ಅಮ್ಮ ಎಂಬ ಸಂಜೀವಿನಿ

ಕತ್ತಲಮೂಲೆಯಲ್ಲಿ
ದುಃಖವನ್ನೇ ಹೊದ್ದು
ಮಲಗಿದ್ದ ನನ್ನ
ಮೌನವನ್ನೇ ಹೆಕ್ಕಿ
ಅರಗಿಸಿಕೊಳ್ಳುತ್ತಾಳೆ
ಬಿಕ್ಕುವ ಮನಕ್ಕೆ
ಸದಾ ಸಂಜೀವಿನಿ ನನ್ನಮ್ಮ!

ಅಗಲ ಮುಖ, ಸುಕ್ಕು
ಗಟ್ಟಿದ ಚರ್ಮ
ನಸುವೇ ಹರಡಿದೆ ಕುಂಕುಮ
ಆಕೆಯ ಬಟ್ಟಲು ಕಂಗಳೇ
ನನಗೆ ಲಾಲಿ ಹಾಡುವ ಚಂದ್ರಮ

ದೇವರಕೋಣೆಯಲ್ಲಿ ಅಮ್ಮನ ಪೂಜೆ
ಮುಖತುಂಬಾ ದೀಪದ ಬೆಳಗು
ಕೋಣೆಯಿಂದ ನಸುನಸುವೇ
ಹರಡುತ್ತಾ ಬರುವ
ಅಗರಬತ್ತಿಯ ಪರಿಮಳ
ದೇವರಿಗೆ ನೈವೇದ್ಯದ ಕಲ್ಲುಸಕ್ಕರೆ
ಮಕ್ಕಳಿಗೆ ಮನತುಂಬಿದ ಅಕ್ಕರೆ

ಅಮ್ಮನ ದಿನ ಎಂಬ ದಿನ ಮಾತ್ರ ಆಕೆಯನ್ನು ನೆನಪಿಸಬೇಕೇ?
ಇಲ್ಲ ಯಾವಾಗಲೂ ನೆನಪಿಸಬೇಕು...ಅದೇನೋ ಸರಿ.... ಆದರೆ ಅಮ್ಮನ ದಿನ ಎಂಬ ವಿಶೇಷ ಅವಕಾಶ ಸಿಕ್ಕರೆ ಅಂದೂ ವಿಶೇಷವಾಗಿ ಸ್ಮರಿಸಿಕೊಂಡರೆ ನಷ್ಟವೇನು?
ಅದಕ್ಕೇ ಈ ನಾಲ್ಕು ಸಾಲು ನನ್ನ ಹೆತ್ತಬ್ಬೆಗೆ.....